Дзюдошы Дидар Хамза Еуропа ашық кубогында алтын иеленді

Австрияда өтіп жатқан Еуропа ашық кубогында 73 келі салмақ дәрежесінде алаңға шыққан Дидар Хамза алтын жүлдеге ие болды, деп хабарлайды ippon.org.

Дидар Хамза бірінші белдесуде руминиялық Флорин Папты, екінші айналымда австриялық Христофер Вагнерді иппон әдісімен жеңді. Одан кейін египеттік дзюдоист Мохамед Мухелдиннен басым түсіп, жартылай финалға жолдама алды. Жартылай финалда бразилиялық Алек Вилиам Помбо Да Силваны тағы да иппон әдісімен тізе бүктіріп, финалға шықты.

Финалда бірнеше Гранд Cлам және әлем кубогы кезеңдерінде жүлде алған, тәжірибелі, тағы бір бразилиялық Маркело Континимен белдесіп, қарсыласынан юко әдісімен жеңді.

Еуропа ашық кубогына жалпы 48 елден 242 дзюдоист қатысып жатыр. Қазақстан құрамасынан 15 балуан ел намысын қорғайды.