Қанат Исламның 21-жекпе-жегі алғаш рет тікелей эфирде көрсетіледі

Отандасымыз Қанат Исламның кәсіпқой бокстағы 21-жекпе-жегін «Қазақстан» Ұлттық арнасы тікелей эфирде көрсетуді жоспарлауда, - деп хабарлайды Baistars.kz.  Бұл туралы «Қазақстан» РТРК» АҚ баспасөз қызметінен хабар таратты.

Кәсіпқой бокс әлемінде «Қазақ» атымен танылған Исламның бұл жолғы қарсыласы 28 жастағы колумбиялық былғары қолғап шебері Хуан Де Анхель.

Басты кездесуі Ислам мен Де Анхель арасындағы жекпе-жек болып табылатын рейтингтік бокс кеші 9 мамыр күні АҚШ-тың Флорида штатындағы Лейкленд қаласында Астана уақытымен таңғы 07:00-де басталмақ.

Кәсіпқой боксқа 2012 жылы ауысқан Қанат Ислам бұған дейінгі өткізген 20 жекпе-жегінің барлығында жеңіске жеткен. Оның ішіндегі 17 кездесуде отандасымыз қарсыластарын нокаутқа түсірген.

Бүгінде Қанат Америка Құрама Штаттарында жаттығады. Бапкері - танымал америкалық маман Нельсон Лопес. Де Анхельге қарсы жекпе-жек - Қанаттың кәсіпқой бокстағы кең ауқымды телеарна көрсететін алғашқы кездесуі.

Ал Хуан Де Анхельге келер болсақ, колумбиялық боксшы 2008 жылдан кәсіпқойлар арасындағы сындарға қатысып келеді. Шаршы алаңда 22 жекпе-жек өткізіп 18-ін өз жеңісімен аяқтаған. Үшеуінде Де Анхельдің қарсыластары басым түссе, бір кездесу (Хуанның кәсіпқой рингтегі алғашқы жекпе-жегі) тең нәтижемен аяқталған.

Отандасымыз Қанат Исламға сәттілік тілейміз!