«Сарыарқа» тобы жаңа бейнеклипінің тұсауын кесті

Сәуірдің 22-жұлдызында «Сарыарқа» дуэті үшінші бейнебаяндарының тұсауын кесті. Кеш Астанадағы «Chicago Music Hall» салтанат сарайында өтті.

Сарыарқаның төсінде танысқан өнерлі жігіттер Қанат Сембеков пен Айдар Байдилдин осыдан 8 жыл бұрын «Сарыарқа» тобын құрып, тыңдармандар ықыласына бөленіп келеді. Қоржындарында 20-дан астам ән, 1 әнжинақ, 3 бейнебаян бар.

Өнердегі жандардың басын қосқан тұсаукесер кеші Астана қаласында алғаш рет ұйымдастырылды. Қонақтар тізімін танымал ақын, сазгерлер, әншілер мен өзге де шоу-бизнес өкілдері толықтырды. «Хор қызы», «Жастық дәурен» әндерімен танымал болған жігіттер, репертуарларындағы Қанат Жүнісіовтың сөзіне жазылған Мұрат Қабыловтың «Бойжеткен» әніне түсірілген бейнебаяндарының тұсауын кесіп, ел ағалары мен тілекшілерінің құттықтауларын алды.

Кештің тізгінін астаналық «ORDA FM» радиосының жүргізушісі Майра Төлепберген, «Қазақстан дауысы» телевизиялық байқауының І маусымында жеңімпаз атанған Шахаризат Сейдахмет және танымал шоумэн Асқар Сүлейменов ұстады.