Ербол Шәріпов «ұрланған» ән туралы түсініктеме берді

Кеше ғана Азия тобы мен Қайрат Нұртастың орындауында тұсауы кесілген күннен сынға іліккен «Шағала қыз» әні жайлы ақпарат таратқан болатынбыз. Тыңдаушылар бұл туындының көшірме екендігін айтқан-ды.

Түп тамыры Арменияда жатқан аталған ән жайлы сұрақтарымызға «Азиялық» Ербол Шәріпов былай жауап берді:
— Әнді сұрап алдыңыз ба, әлде сатып алдыңыз ба?
— Біріншіден бұл плагиат емес, ұрлық емес. Ұрлап алатындай біз әннің қайырмасын бөлек, шумағын бөлек құрастырып алған жоқпыз. Екіншіден, біз бар әнге тек мәтін жазып қазақ халқына ұсындық.
— Сіздерге дейін бұл әнді «Терция» тобы орындаған екен, ол туралы білесіздер ме?
— Бұл әнді қазақ әншілерінен нақты кім айтатынын білмейміз. Оның үстіне «Терция» деген топты танымайды екенмін.
— Ендігі жерде ән кімдікі болмақ?
— Халық қай нұсқаны ұнатса, ән соныкі болады ғой. Ол заңдылық. Міндетті түрде солай болуы керек. Кім халықтың жүрегіне жеткізе білсе, ән сол орындаушының қоржынында қала береді.