Сеньор Сәбит жасөспірімдер театрына директор болды

Алматыдағы М.Әуезов пен Ғ.Мүсірепов театрларының директорлары ауысты.
Басшылыққа келген екі директордың да сахнада өзіндік орны бар, қалың көпшіліктің көңілінен шыққан әртістер.

Әуезов театрының жаңа басшысы болып ҚР еңбек сіңірген қайраткері, Қазақстан Жастар одағы сыйлығы лауреаты Ерлан Біләл тағайындалды.

1971жылы Алматы облысы, Райымбек ауданы, Текесауылында дүниеге келген ол 1993 жылы Қазақ Мемлекеттік Т.Жүргенов атындағы Театр-Кино институтын (қазіргі Өнер академиясы) театр-кино актері мамандығы бойынша бітірген. 2011ж. 12 қыркүйегінен бастап театр директорының орынбасары.
Белгілі актер ұлттық классика мен заманауи драматургияда – М.Әуезовтің «Абайында» Керім, «Қарагөзінде» Сырым, «Еңлік-Кебегінде» Кебек, «Айман-Шолпанында» Әлібек, «Абайында» Абай, «Қилы заманында» Ұзақ батыр, Д.Исабековтің «Жаужүрегінде» Балуан Шолақ, Б.Жәкиевтің «Жүрейік жүрек ауыртпайында» қарияның ұлы, И.Сапарбайдың «Сыған серенадасындағы» Шәмші, «Қыз мұңында» генерал, Ғ.Мүсіреповтің «Махаббат дастанында» Қозы, Д.Амантайдың «Сәлеметсің бе, қоңыр мұңында!» Қаранар, Б.Мұқайдың «Өмірзаясында» Жас жігіт, Ш.Құсайыновтың «Үкілі Ыбырайында» Ыбырай, Қ.Ысқақтың «Жан қимағында» Сұлтанмахмұт, Ә.Таразидің «Ақын… Періште…Махаббатында…» Ақын, М.Ғапаровтың «Тұзды шөлінде» Темір, Қ.Ысқақ, Шахимарденнің «Қазақтарында» Мұхаммед Шайбани, Иран- Ғайыптың «Мен ішпеген у бар ма?..» реквиемінде Құнанбай, т.б. рөлдерін шебер сомдаған. Оған қоса «Хабар» телеарнасында «Алтыбақан», «Кеш қалмаңыз», «Атамекенді» бағдарламаларының жүргізушісі ретінде де кеңінен танымал. Фильмдердің қазақ тілінде көркем шығуына, яғни дубляжға да атсалысып жүр.

Ал, Ғабит Мүсірепов атындағы Қазақ Мемлекеттік Академиялық балалар мен жасөспірімдер театрының жаңа басшысы — актер Сәбит Әбдіхалықов.

Ол 1992 жылы Қазақ мемлекеттік театр және кино институтына «Драма және киноактер» мамандығына түсіп, кәсіби деңгейдегі актер мамандығын игерген. Кішкентайынан «Тамашаны» көріп, Құдайберген, Мейірман ағаларына еліктеген ол, оқу бітірген соң «Бауыржан шоуға» барады. «Тамашада» да, «Бауыржан шоуда» да өнер көрсетіп, кейін 2003 жылы Жанатбек Бәйтеков екеуі «Мафия мен Тақия» театрын ашты. Көпшілік актер ретінде ғана танитын Сәбит Әбдіхалықов 25-ке жуық сахналық қойылым – сатиралардың авторы. 2007 жылы ашылған «Қазығұртфильм» кино студиясының директоры. Кино саласындағы білімін Америкаға барып жетілдіріп келген актер, «Қанталапай», «Любовь в кредит», «Біздің ауыл Воо» сияқты киноларды түсірген.

Қос театр да көрермен көпшіліктен, мағыналы қойылымдарымен, жоғары баға алған. Жаңа басшыларды жаңа қызметтерімен құттықтаймыз!