«Астана» тұңғыш рет Чемпиондар лигасының топтық кезеңіне шықты

Қазақстандық «Астана» футбол клубы тарихында тұңғыш рет Чемпиондар лигасының топтық кезеңіне шықты.

Сырт алаңда Кипрдің «АПОЭЛ» командасымен «Астана» клубының кездесуі 1:1 есебімен тең аяқталды.

«АПОЭЛ» ойынның 60-шы минутында есеп ашты. Кездесу соңына таман оң қапталдан Бауыржан Жолшиевтің берген пасын Неманья Максимович алаң иелерінің қақпасына енгізіп, есепті теңестірді.

Кездесудің Никосия(Кипр) қаласында өткеніне қарамастан, астаналық жанкүйерлер Астандағы «ҚазМедиа» орталығының алдында тұрып, тікелей эфирде ойынды тамашалады.

Апта бұрын өткізілген Астанадағы матчта елордалықтар 1:0 есебімен жеңіске жеткен болатын. Екі ойынның қорытындысы бойынша «Астана» Чемпиондар лигасының топтық кезеңіне жолдама алды. Бұл – қазақ футболы үшін тарихи сәт! Себебі қазақстандық футболшылар тұңғыш рет үздік 32 команданың сапында өнер көрсетуге мүмкіндік алды.

vesti.kz