Димаш Құдайбергенов миллионер атанды

 Кездесуге әншінің ата-анасы, ата-әжесі мен ұстаздары, әндерін өңдеуші Бақытбек Зейнелов қатысты. Өңір басшысы өнерпаздың шығармашылығына сәттілік тілеп, алғыс хат пен 5 миллион теңгенің сертификатын табыс етті.

«Бұдан бес жыл бұрын Ди­маштың өнерімен таныстым. Сол кезден бері жанкүйерімін. Фести­валь туралы айтар болсам, 24 жыл­дық тарихы бар екен. Өнер сала­сының мамандары, ардагерлері Димаштың өнерін тамашалап, жоғары бағасын беріп жатыр. Бұл еліміздің, өңіріміздің беделінің асқақтағаны деп білемін», – деді өңір басшысы А.Мұхамбетов.

Димаш Құдайбергенов өткен жылы Ахмет Жұбанов атындағы Ақтөбе музыкалық колледжінің «Академиялық ән салу» маман­дығы бойынша оқуды тәмамдады. Қазір Қазақ ұлттық өнер акаде­мия­сында «Эстрада өнері» факуль­тетінде білім алып жүр. Еңбек жолын Ғазиза Жұбанова атындағы Ақтөбе облыстық филармонияның әншісі болып бастады. «Бай­қоң­ыр­дың ашық дауыстары» халық­аралық фестивалінде  бірінші орынды, «Жас қанат» байқауында бас жүлдені жеңіп алды. Ялтада өткен «Шығыс базары – 2012» эстрада орындаушылары байқауында  бірінші, 2013 жылы Қырғызстанда өткен «Мейкин Азия – 2013» фес­ти­валінде бас жүлдені қанжыға­сына байлады. Жеңіспен басталып, жең­іс­пен жалғасып келе жатқан өнер жолында көптеген арман-тілектері бар. Ол қазақ атын әлемге танытқысы келеді. Қазіргі түсіп жатқан ұсыныстар да қомақты. Алда Францияда ән шырқап, Лос-Анджелесте тәжірибе жинай­ды.

«Мен бақытты адаммын. Ме­нің жұмысым – ән айту. Өнерім – менің өмірім. Сондықтан қиын, бос уақыт жоқ деген шағым айтпаймын. Бар күшімді білім алуға, ой-танымымды кеңейтуге арнаймын«, – дейді Димаш Құдай­бер­генов. Шығармашылық жоспа­ры да ұшан-теңіз. Ол Астана мен Ал­маты қалаларында концерт беруді ойлап жүр.

Димаштың Витебскіге баруына Ғазиза Жұбанова атындағы облыс­тық филармониясы қаржылай қолдау көрсетті.

aikyn.kz