Нұрсұлтан Назарбаев «Абай» операсын тамашалады

Қазақстан президенті Нұрсұлтан Назарбаев Қазақ хандығының 550 жылдығына арналып қойылған «Абай» операсына барды деп хабарлайды Ақорданың баспасөз қызметі.

Операның идеялық арқауы ретінде қазақтың ұлы ақыны, ағартушы және философ Абай Құнанбайұлының тұлғасы алынған. Сценографияда соңғы техникалық жаңалықтардың пайдаланылуы және музыкалық шығарманың сюжетін заманауи тұрғыдан интерпретациялау қойылымды даралай түскен.

Үшінші премьералық опера спектаклінің басты орындаушылары қатарында Қазақстанның еңбек сіңірген қайраткерлері Т.Мұсабаев, А.Ниязова, Ж.Тапин, сондай-ақ Армения халық әртісі Б.Туманян бар.

Қойылымды көрермен назарына қазақстандық-италиялық шығармашылық ұжым ұсынды.  Қоюшы дирижері  – «Астана опера» театрының бас дирижері, Қазақстанның еңбек сіңірген қайраткері А.Бөрібаев, қоюшы режиссері – италиялық режиссер Д.дель Монако, режиссердің консультанты  – Қазақстан халық әртісі Е.Обаев.