Айқын Астанада есеп берді

Қазақ эстрадасында әндерін ерекше орындап, тыңдарманының жүрегіне жете білетін Айқын Төлепбергеннің  Астанада алғаш рет жеке есеп беру концерті өтті.  Бейбітшілік және келісім сарайында өткен кешке өнердегі достары Ділназ Ахмадиева, Мақпал Исабекова, Ернар Айдар, Әділет Жеңіс және "Family" тобы қатысты. Жанды дауыста өткен концерт көрермен көңілін бір серпілтті.

Айқын концертке дайындық кезінде: "Өзімнің шығармашылық кешім болғандықтан, 12 жыл ішінде орындаған әндерімнің ең-ең дегендерін таңдап, үздіктерін орындаймын. Жаңа бірнеше әнімнің тұсаукесерін де өткізуді жоспарлап отырмын.  Украинадан арнайы режиссер шақыртып, көрермендеріме әдемі шоу сыйлағым келеді. Бұл Астанадағы тұңғыш ауқымды концертім. Қазақстанның әр аймағында концерт беріп, жанкүйерлеріммен кездестім, өлеңдерімді айттым. Ал Астана мен Алматыда үлкен концерт беру – бұл әр әншінің арманы. Және оны жоғары деңгейде өткізу қиынның қиыны. Бірақ, сатылымдағы билеттер осыдан екі апта бұрын таусылып, залда ине шаншар орын болмайды деп күтіп отырмыз"-деген болатын.

Айқын халыққа  "Superstаr kz" жобасы арқылы танылды. "Алтыным", "Пах-пах", "Әр атқан таңым", "Үмітің үзілмесін", "Как дела" сияқты көптеген әндері хитке айналған. Продюсері Эрик Тастамбеков.